2024–2025 காலகட்டத்தில் உலகம் முழுவதும் 189 பத்திரிகையாளர்கள் கொல்லப்பட்டுள்ளனர். அவர்களில் 127 பேர் மோதல் பகுதிகளில் உயிரிழந்துள்ளனர். பத்திரிகையாளர்கள் கொல்லப்படும் வழக்குகளில் 86 சதவீதம் இன்னும் தீர்வு காணப்படாத நிலையில் இருப்பதாக யுனெஸ்கோ தெரிவித்துள்ளது.
உலகெங்கிலும் பத்திரிகையாளர்கள் எதிர்கொள்ளும் உயிர் அச்சுறுத்தல் அதிகரித்து வரும் நிலையில், அவர்கள் கொல்லப்படும் வழக்குகளில் ஆறு வழக்குகளுக்கு நீதி கிடைப்பதில்லை என்ற அதிர்ச்சிகரமான தகவலை யுனெஸ்கோ வெளியிட்டுள்ளது. 2024–2025 காலகட்டத்தில் பத்திரிகையாளர்கள் கொல்லப்பட்ட வழக்குகளில் 86 சதவீதம் இன்னும் தீர்வு காணப்படாத நிலையில் இருப்பதாக அந்த அமைப்பின் புதிய அறிக்கை சுட்டிக்காட்டியுள்ளது.
2026 நவம்பர் 2ஆம் தேதி வெளியிடப்பட்ட யுனெஸ்கோவின் பத்திரிகையாளர்கள் பாதுகாப்பு மற்றும் தண்டனையின்மை தொடர்பான அறிக்கை, உலகளாவிய ஊடகச் சுதந்திரம் எதிர்கொள்ளும் முக்கியமான சவால்களை வெளிச்சத்துக்குக் கொண்டுவந்துள்ளது.
கடந்த 2024 மற்றும் 2025 ஆகிய இரண்டு ஆண்டுகளில் மட்டும் உலகம் முழுவதும் 189 பத்திரிகையாளர்கள் கொல்லப்பட்டுள்ளனர். இது அதற்கு முந்தைய இரண்டு ஆண்டு காலகட்டத்துடன் ஒப்பிடுகையில் 20 சதவீதம் அதிகமாகும். கொல்லப்பட்ட 189 பேரில் 127 பேர் போர் மற்றும் ஆயுத மோதல்கள் நடைபெறும் பகுதிகளில் செய்தி சேகரிப்புப் பணியில் ஈடுபட்டிருந்தபோது உயிரிழந்துள்ளனர்.
போர் முனைகளில் செய்தி சேகரிக்கும் பத்திரிகையாளர்களுக்கு ட்ரோன் தாக்குதல்கள் புதிய அச்சுறுத்தலாக உருவெடுத்துள்ளதாக யுனெஸ்கோ அறிக்கை எச்சரிக்கிறது. 2024–2025 காலகட்டத்தில் மோதல் பகுதிகளில் கொல்லப்பட்ட பத்திரிகையாளர்களில் 50 பேர் ட்ரோன் தாக்குதல்களால் உயிரிழந்துள்ளனர். இது அந்தப் பகுதிகளில் கொல்லப்பட்டவர்களில் 40 சதவீதமாகும்.
மேலும், ஒரே தாக்குதலில் பல பத்திரிகையாளர்கள் குறிவைத்துக் கொல்லப்பட்ட ஏழு சம்பவங்களையும் யுனெஸ்கோ பதிவு செய்துள்ளது. ஊடக அலுவலகங்கள் மற்றும் தற்காலிக செய்தி சேகரிப்பு மையங்கள் மீதான தாக்குதல்களும் இதில் அடங்கும். பத்திரிகையாளர் என்பதை அடையாளப்படுத்தும் பாதுகாப்பு உடைகளை அணிந்திருந்தபோதும் அல்லது ‘பிரஸ்’ என்று தெளிவாகக் குறிக்கப்பட்ட வாகனங்களில் பயணித்தபோதும் 15 பத்திரிகையாளர்கள் கொல்லப்பட்டதாக அறிக்கை குறிப்பிடுகிறது.
உலகளாவிய அளவில் பத்திரிகையாளர்களுக்கு எதிரான குற்றங்களில் தண்டனையின்மை அதிகரித்திருந்தாலும், போர் மற்றும் ஆயுத மோதல்கள் இல்லாத நாடுகளில் ஓரளவு முன்னேற்றம் ஏற்பட்டுள்ளது. 2012ஆம் ஆண்டில் 94 சதவீதமாக இருந்த தண்டனையின்மை விகிதம், 2026ஆம் ஆண்டில் 77 சதவீதமாகக் குறைந்துள்ளது. மோதல்கள் இல்லாத பகுதிகளில் பத்திரிகையாளர்கள் கொல்லப்பட்ட எண்ணிக்கை 85 ஆகக் குறைந்துள்ளது; இது கடந்த 18 ஆண்டுகளில் பதிவான மிகக் குறைந்த எண்ணிக்கையாகும்.
2024–2025 காலகட்டத்தில் 14 பெண் பத்திரிகையாளர்கள் கொல்லப்பட்டுள்ளனர். அவர்களில் 93 சதவீதம் பேர் மோதல் பகுதிகளில் செய்தி சேகரித்தபோது உயிரிழந்துள்ளனர். 2025ஆம் ஆண்டு ஐ.நா. பெண்கள் அமைப்பு மற்றும் சர்வதேச பத்திரிகையாளர்கள் மையம் இணைந்து நடத்திய ஆய்வில், 75 சதவீத பெண் பத்திரிகையாளர்கள் இணையவழி அல்லது நேரடி துன்புறுத்தல்களை எதிர்கொண்டுள்ளதாகத் தெரியவந்துள்ளது.
மேலும், இணையவழி வன்முறையின் விளைவாக நேரடி வன்முறையை எதிர்கொண்டதாகத் தெரிவித்த பெண்களின் விகிதம், 2020ஆம் ஆண்டில் 20 சதவீதமாக இருந்த நிலையில், 2025ஆம் ஆண்டில் 40 சதவீதத்திற்கும் அதிகமாக உயர்ந்துள்ளது.
போர் முனைகளில் செய்தி சேகரிக்கும் பத்திரிகையாளர்கள் தங்களது உயிரைப் பணயம் வைத்து பொதுமக்களுக்கு தகவல்களை வழங்கி வருகின்றனர். ஆனால் அவர்களைக் கொலை செய்பவர்கள் பல நேரங்களில் சட்டத்தின் முன் நிறுத்தப்படுவதில்லை என்று யுனெஸ்கோ கவலை தெரிவித்துள்ளது.
2015ஆம் ஆண்டு ஒருமனதாக ஏற்றுக்கொள்ளப்பட்ட ஐ.நா. பாதுகாப்பு கவுன்சில் தீர்மானம் 2222-ஐ மதித்து செயல்பட வேண்டும் என்றும், ஆயுத மோதல்களின் போது பத்திரிகையாளர்கள் மற்றும் ஊடகப் பணியாளர்களை பொதுமக்களாகப் பாதுகாக்க வேண்டும் என்றும் யுனெஸ்கோவின் தலைமை இயக்குநர் காலித் எல்-எனானி வலியுறுத்தியுள்ளார்.
பத்திரிகையாளர்கள் மீதான தாக்குதல்களுக்கு உரிய விசாரணையும் நீதியும் உறுதி செய்யப்படாவிட்டால், அது தனிநபர்களின் உயிரிழப்புடன் முடிவதில்லை. ஊழல், மனித உரிமை மீறல்கள் மற்றும் குற்றச்செயல்களை வெளிக்கொணரும் சுதந்திரமான செய்தியாளர்களின் பணியையும் அச்சுறுத்துகிறது.
ஊடகச் சுதந்திரம் என்பது பத்திரிகையாளர்களின் உரிமை மட்டுமல்ல; உண்மையான தகவல்களைப் பெறும் பொதுமக்களின் உரிமையும் கூட. எனவே, பத்திரிகையாளர்களின் பாதுகாப்பையும் அவர்கள் மீதான குற்றங்களுக்கு நீதியையும் உறுதி செய்வது உலக நாடுகளின் முக்கியப் பொறுப்பாகிறது.
